يعنى ايه مغالطات منطقية؟
المغالطة المنطقية (logical fallacy) هى خطأ فى الاستدلال أو خلل فى المنطق المستخدم لإثبات حجة أو فكرة معينة، وبالتالى الشخص اللى بيعمل مغالطة منطقية يقدر يخدع المتلقى ويقنعه بحاجة مش صح سواء كان متعمد الخداع أو بيعمل ده عن غير قصد.
ومن أكتر الحاجات اللى بتظهر فيها المغالطات المنطقية هى النقاش فى المواضيع الجدلية واللى كل طرف بيحاول يبرهن على صحة رأيه وفى محاولته للبرهنة بيعمل مغالطات ظناً منه أنه كدة بيستدل بشكل منطقى على صحة رأيه، فعشان كدة بنلاقى المغالطات دى موجودة كتير فى الإعلام والدعاية للمنتجات أو الدعاية السياسية والمناظرات والنقاشات على منصات التواصل الاجتماعى (social media).
وأهمية موضوع المغالطات هى أن محدش يضحك علينا بكلام شكله حلو ومنطقى ويقنعنا بحاجة مش صحيحة، وكمان عشان نتجنب أننا نعمل المغالطات دى بشكل غير مقصود واحنا بنتناقش فى أى موضوع عشان منضعفش من موقفنا أو من الحجة اللى بنحاول نبرهن على صحتها لو حد اكتشف أن كلامنا فيه مغالطات منطقية.
أنواع المغالطات المنطقية
فيه أنواع كتير للمغالطات المنطقية واللى هحاول فى كل مرة أركز على نوع واحد منهم. والهدف من التصنيفات والتسميات دى هى أننا نقدر نتعرف على كل نمط (pattern) من المغالطات ونسميه باسم معين عشان لما نذكره أو نتكلم عنه يبقى مفهوم احنا قصدنا ايه ومنضطرش كل مرة نتناقش فيها مع حد نشرح من الأول يعنى ايه مغالطة وايه المشكلة فى البناء المنطقى اللى حد بيعمله.
ايه الهدف من السلسلة دى؟
طبعاً ده مش موضوع جديد وممكن يكون مألوف بالنسبة لناس كتير، وأى حد يقدر يدور على جوجل عن الموضوع ده ويدخل فى تفاصيل أكتر، لكن فى نفس الوقت المحتوى العربى على النت فى الموضوع ده ضعيف جداً وكمان فيه شوية تحايل فى الكلام عنه .. وعشان كدة الهدف مش مجرد عرض لتعريف المغالطات بأنواعها المختلفة، ولكنها محاولة لتوضيح المغالطات بأمثلة من الواقع وخصوصاً فى إطار الثقافة العربية، وكذلك هى محاولة للتدريب على التعرف على المغالطات وفهمها بشكل أعمق.
Comments
Post a Comment