لو مش عارف يعنى ايه مغالطات منطقية وحابب تعرف هى ايه وأهميتها وأنواعها والهدف من السلسلة دى، تقدر تشوف المقدمة عن موضوع المغالطات المنطقية من هنا.
ايه هى مغالطة الرنجة الحمرا؟
مغالطة الرنجة الحمرا (red herring) هى مغالطة منطقية بيتم فيها تغيير مسار النقاش لموضوع تانى بهدف التهرب من مناقشة الحجة المطروحة. والرنجة الحمرا دى كانوا بيستخدموها زمان عشان يشتتوا كلاب الحراسة عن مطاردة الهدف الرئيسى بتاعهم لأن ريحتها نفاذة جداً. ومن هنا جت تسمية المغالطة واللى برده بيحصل فيها التشتيت أو الغلوشة بطرح حجج أو نقط تانية ممكن تكون مستفزة أو مثيرة للانتباه لكنها ملهاش علاقة بجوهر الحجة أو القضية الرئيسية اللى بييتم مناقشتها.
شوية أمثلة
مغالطة (1):
- الحكومة فاشلة فى ملف التعليم ومفيش أى تحسن
- بس أنت مش شايف المشاريع الكبيرة اللى الحكومة بتعملها فى تطوير المدن والصناعة، عايز تقول أنها ملهاش لازمة يعنى؟
التحليل والرد: هنا بدل ما الشخص التانى يرد على النقطة المتعلقة بالتعليم، بدأ يتكلم عن حاجات تانية ملهاش علاقة بالتعليم وبيحاول يستفز الشخص الأول عشان يشتته عن موضوع التعليم.
مغالطة (2):
- ما يسمى بالفتوحات الإسلامية كانت توسعات استعمارية وتم فيها ممارسات غير أخلاقية من سبى ونهب وقتل
- لو شوفت اللى عمله الغربيين أثناء الحرب العالمية التانية من مجازر واغتصاب جماعى وقتل للأطفال هتلاقى أن مفيش مقارنة بين اللى هم عملوه واللى المسلمين كانوا بيعملوه فى الفتوحات
التحليل والرد: الرد فى حد ذاته ممكن ميكونش فيه أى معلومات غلط لكن مشكلته أنه مش بيتكلم خالص على إذا كان اللى حصل فى الفتوحات الإسلامية حقيقى ولا مش حقيقى، ولا إذا كان يعتبر مقبول أو غير مقبول بمعاييرنا الحالية. فحتى لو فيه ناس غير مسلمين عملوا حاجات بشعة كتير فى الماضى أو الحاضر، فده مش بيبرر أى أعمال غير أخلاقية ممكن يكون عملها ناس مسلمين.
مغالطة (3):
- النساء فى مجتماعتنا بيتعرضوا لظلم وعنف وقمع بشكل كبير ولازم يكون فيه تغيير لنظرة المجتمع للمرأة
- أنت عندك فكرة عن عدد حوادث القتل والاغتصاب والتحرش وزنا المحارم فى أمريكا وأوروبا اللى بيدعوا الرقى والاهتمام بحقوق المرأة؟!
التحليل والرد: برده الكلام عن اللى بيحصل فى أمريكا وأوروبا ملوش علاقة بالنقطة الأساسية المتعلقة بالعنف ضد المرأة فى مجتماعتنا وازاى نصلح المشاكل اللى عندنا.
مغالطة (4):
- قوانين الميراث الحالية غير عادلة لأنها مش بتساوى بين الرجل والمرأة
- أنت متعرفش أن فيه أكتر من 30 حالة بترث فيهم المرأة زى الرجل ويمكن أكتر كمان، وفيه حالات بترث فيها المرأة فى حين أن الرجل لا يرث
التحليل والرد: الشخص اللى بيرد هنا بيتطرق لحالات تانية من البديهى أصلاً أن الرجل ميورثش فيها أكتر من المرأة زى مثلاً الابنة والعم، وممكن يقعد يفند الحالات الكتير دى بدل ما يرد على الحالة الأساسية اللى هى الابن والابنة ويقول هل ده عادل ولا مش عادل وليه من غير ما يتطرق أساساً للحالات التانية دى.
مغالطة (5):
- القطط والكلاب المشردة ميستحقوش اللى بيحصلهم فى الشوارع ولازم يكون فيه اهتمام أكتر بالموضوع ده
- طب والبشر المشردين واللى مش لاقيين ياكلوا يستحقوا اللى بيحصلهم؟ ليه مش بتتكلموا عنهم وعن حقوق الإنسان فى حياة آدمية؟
التحليل والرد: ال"ماذاعنية" أو الwhataboutism هى من أنواع مغالطة الرنجة الحمرا، واللى فيها لما حد يتكلم على حاجة فالتانى يرد عليه: "وماذا عن كذا؟"، فبدل ما يرد أو يعلق على القضية المطروحة بيرد بسؤال عن حاجة تانية وغالباً ما بيكون فيه اتهام أو طلب لإجابة عنه. ومثال تانى لما حد يكون يتكلم عن جرائم القتل ضد النساء فحد يرد: "طب وليه مش بتتكلموا عن جرايم القتل ضد الرجال؟"
مغالطة (6):
- حد بيكلم خدمة العملاء عشان يلغى اشتراك الخدمة اللى مش راضى عن أدائها
- فيرد عليه الموظف: متعرفش أننا عاملين عرض جديد يخليك تدفع نص الثمن اللى كنت بتدفعه قبل كدة؟
التحليل والرد: هنا الموظف بيحاول يغرى العميل بعرض جديد عشان يصرف انتباهه عن مشاكل الخدمة اللى كان بيشتكى منها وبسببها عايز يلغى اشتراكه، والأسلوب ده بيستخدم كتير فى التعامل مع العملاء والبيع والتفاوض.
Comments
Post a Comment